ଭୁବନେଶ୍ୱର: ରାଜଧାନୀ ଭୁବନେଶ୍ୱରର ଏକାଧିକ ପୂଜାମଣ୍ଡପରୁ ଲୁଟ୍ ଘଟଣାରେ କମିସନରେଟ୍ ପୋଲିସ ବିଭିନ୍ନ ପୂଜା ମଣ୍ଡପରୁ ୬ ଜଣ ମହିଳାଙ୍କ ସମେତ ୩୦ରୁ ଅଧିକ ସନ୍ଦିଗ୍ଧ ଲୁଟେରାଙ୍କୁ ଉଠାଇ ନେଇ ଅଟକ ରଖିଛି । ଅଟକ ଥିବା ଅଭିଯୁକ୍ତମାନଙ୍କୁ ପୋଲିସ ପଚରାଉଚରା କରୁଛି । ଖଣ୍ଡଗିରି ଥାନା, ମଞ୍ଚେଶ୍ୱର ଥାନା, ଲକ୍ଷ୍ମୀସାଗର ଥାନା, ନୟାପଲ୍ଲୀ ଥାନା ଓ ସହିଦନଗର ଥାନାରେ ସନ୍ଦିଗ୍ଧ ଲୁଟେରାମାନେ ଅଟକ ରଖାଯାଇଛି । ଖଣ୍ଡଗିରି ଥାନାରେ ମହିଳା ଲୁଟେରା ଗ୍ୟାଙ୍ଗକୁ ଅଟକ ରଖାଯାଇଛି । ଲୁଟେରାମାନଙ୍କ ଠାରୁ ପୋଲିସ ବହୁ ଚୋରି ସାମଗ୍ରୀ ଜବତ କରିଛି ।
୩୦ ଜଣଙ୍କଠୁ ହୋଇଥିଲା ଲୁଟ୍
ରବିବାର ଅଷ୍ଟମୀରେ ବିଭିନ୍ନ ପୂଜା ମଣ୍ଡପ ଓ ଗହଳିର ସୁଯୋଗ ନେଇ ଲୁଟେରାମାନେ ସୁନାଚେନ୍ ସମତେ ମୋବାଇଲ ଓ ପର୍ସ ଆଦି ଲୁଟିଥିଲେ । କେବଳ ବମିଖାଲ ଦୁର୍ଗାମଣ୍ଡପରେ ଲୁଟ ଘଟଣାରେ ୮ ଜଣଙ୍କୁ କାବୁ କରିଥିଲେ ମଣ୍ଡପ କର୍ମକର୍ତ୍ତା । ଏଠାରେ ୧୫ ମିନିଟ ଭିତରେ ୧୦ ଭରିର ସୁନା ଚେନ ଲୁଟିଥିଲେ । ଅନ୍ୟ ମଣ୍ଡପରେ ମଧ୍ୟ ଶ୍ରଦ୍ଧାଳୁଙ୍କୁ ସମଦଶା ଭୋଗିବାକୁ ପଡିଥିଲା । ଭୁବନେଶ୍ୱର ଓ ଏହାର ଉପକଣ୍ଠରେ ୩୦ ଜଣଙ୍କ ଠାରୁ ଚେନ୍, ମୋବାଇଲ, ପର୍ସ ଚୋରି ନେଇ ଥାନାରେ ଅଭିଯୋଗ ହେବା ପରେ ପୋଲିସ ସନ୍ଦିଗ୍ଧଙ୍କୁ ଉଠାଇଛି ।
ବାହାର ରାଜ୍ୟରୁ ଆସିଛନ୍ତି ଲୁଟେରା
ପୋଲିସ କହିଛି ଯେ, ଲୁଟେରାମାନଙ୍କ ମଧ୍ୟରୁ ୬ ଜଣ ମହିଳା ଅଛନ୍ତି । ଏମାନେ ବାହାର ରାଜ୍ୟରୁ ଆସିଛନ୍ତି । ଯେପରି ଲୋକେ ତାଙ୍କୁ ସନ୍ଦେହ ନ କରିବେ ସେଥିପାଇଁ ସାଙ୍ଗରେ ଛୋଟ ଛୁଆ ଓ ମହିଳା ମାନଙ୍କୁ ଆଣି ଅପରେସନ କରୁଥିଲେ । ଥାନାରେ ଅଟକ ରଖାଯିବା ସହ ସେମାନଙ୍କ ନିକଟରୁ ମୋବାଇଲ ଫୋନ ଓ ନଗଦ ଟଙ୍କା ଜବତ କରାଯାଇଛି । ପୂଜା ମଣ୍ଡପରେ ମା’ମାନଙ୍କର ସୁରକ୍ଷା ପାଇଁ କଡାକଡ଼ି ବ୍ୟବସ୍ଥା କରାଯାଇଛି । ସାଦା ପୋଷାକଧାରି ପୋଲିସ ସମେତ ମହିଳା ପୁଲିସ ମୃତୟନ କରାଯାଇଛି ।
